橫向捲軸遊戲

一隻典型嘅 2D 橫向捲軸遊戲；如果玩家控制主角向右行，個虛擬鏡頭會跟住向右郁。

橫向捲軸遊戲（粵拼：waang4 hoeng3 gyun2 zuk6 jau4 hei3；英文：side-scroller）係指一隻電子遊戲涉及「個虛擬鏡頭跟住主角郁，以主角做畫面中心」噉嘅情況－

• 個鏡頭由玩家角色嘅側邊睇嘢；
• 玩家角色可以向鏡頭嘅左同右郁動（2D）；
• 個鏡頭會跟住玩家角色郁動；

橫向捲軸被指對平台遊戲影響深遠：無捲軸平台遊戲嘅關卡，大細上焗住要合乎隻遊戲嘅平台嘅熒光幕，所以唔可以太大；橫向捲軸平台遊戲就唔同，可以有極大或者極長嘅關卡，呢點令到平台遊戲嘅關卡設計多樣化咗好多。事實係喺打後嘅平台遊戲界裏面，橫向捲軸成為咗業界標準咁滯－1980 年代之後出嘅 2D 平台遊戲，大多數都採用咗橫向捲軸或者類似嘅做法。

自動捲軸

某啲平台遊戲仲會有關卡玩自動捲軸（auto-scrolling）－即係無論玩家角色喺邊，鏡頭都會以若干速度前進，而玩家角色如果跌出鏡頭外嘅空間就會死。例子可以睇吓《孖寶兄弟 3》（1988 年）嘅關卡 1-4、3-6、5-6、5-9、6-2、6-7、7-4。

簡史

南夢宮發行嘅《食鬼世界》（1984 年）、任天堂嘅《孖寶兄弟》（1985 年）以及 Capcom 嘅《洛克人》（1987 年）都係採用咗橫向捲軸技術嘅出名早期作品。值得一提嘅係，《孖寶兄弟》係史上其中一隻最好賣嘅電子遊戲，直至 1996 年為止賣咗成超過 5,000 萬件。

聲介面

用橫向捲軸嘅範式可以做出盲人都可以玩，純綷用鍵盤輸入，聲介面輸出嘅遊戲，但係用聲只能夠表示最多大概三種變數。

睇埋

• 平台遊戲
• 紅白機

拎

• Auto-Scrolling Level. TV Tropes.