嶺南建築

嶺南建築（粵拼：Ling⁵ naam⁴ gin³ zuk¹）係嶺南主要族群－廣府民系－嘅建築風格。呢種風格源遠流長，係中國最有影響力嘅建築風格之一。

未漢化之前：南越建築

内文：南越建築

南越建築（粵拼：Naam⁴ jyut⁶ gin³ zuk¹）係嶺南未漢化之前（公元 7 世紀之前）嘅原住民南越族嘅建築。對於南越族嘅建築學界而家都重未係好清楚，但係廣東廣西有幾座南越國嘅遺址，令到現代人可以睇到少少南越建築嘅特色。

• 
  廣州南越王墓嘅東耳室
• 
  南越王墓嘅墓室
• 
  南越王墓平面圖
• 
  南越國水閘嘅模型

唐朝建築

内文：唐朝建築

嶺南文化受大唐同大宋嘅漢文化影響得好犀利。喺 4 至 10 世紀（隋唐時期），有好多中原嘅高僧都會走嚟嶺南度傳佛教，所以令到嶺南有啲有唐朝建築（粵拼：Tong⁴ ciu⁴ gin³ zuk¹）元素嘅佛寺，好似係廣州嘅光孝寺就係咁。而且自從 19 世紀以嚟，粵港地區重起咗唔少新嘅唐朝建築。呢種建築風格出咗名規模宏大、規劃嚴謹、色調簡潔、主要用木頭做料、又會將藝術性同結構性嘅設計融合埋一齊。例如係香港喺廿世紀初嗰陣時起嘅志蓮淨院，就係攞咗唐朝嘅建築做板起嘅。佢同古典嶺南建築好明顯唔同：佢規模好宏大－會有好多向外揚嘅造型，又會用金同紅呢啲鮮艷嘅顏色（古典嶺南建築係四四方方兼且色水淡嘅）－而且大半都係用木整嘅。呢柞特徵令到成棟嘢望落同日本京都嘅佛寺群（都係用唐朝建築做板嘅）好似。而中國大陸嘅粵廣地區由 1980 年代都開始起呢類建築物，例如係深圳文博館。

• 
  廣州光孝寺嘅鼓樓
• 
  光孝寺大雄寶殿嘅東側
• 
  香港志蓮淨院嘅天王殿
• 
  志蓮淨院嘅萬佛塔；望落同京都法隆寺嘅五重塔好似。

古典嶺南建築

西關嘅陳氏書院都係一座幾典型嘅嶺南建築。佢喺 19 世紀尾起，用咗好多民間工藝品同雕塑做裝飾，畀好多人覺得係區入面起得最靚嘅家祠之一，重畀人列咗入羊城八景。

古典嶺南建築（粵拼：Gu² din² ling⁵ naam⁴ gin³ zuk¹）係 14 世紀嶺南開始有咗嘅一種風格。嗰時嶺南漢化得七七八八，形成咗一種新風格。古典嶺南建築好有地方特色：同中原核心地帶（即係北方）比起上嚟，嶺南氣候又熱又濕立立，如果將中原嗰套建築風格直接搬落嚟嘅話，會好容易有温度唔舒服或者發霉呢類濕滯嘢。所以粵人整咗一套同中原人唔同嘅建築風格。古典嶺南建築通常比較輕，而且會用通透同冇咁易發霉嘅材料起，色水會偏好灰白或者係綠呢啲柔和嘅色調。喺結構方面，呢啲建築通常有多層嘅斜坡頂同方形柱，而且因為氣候冇中原地方咁凍，令到嗰度啲人鍾意向外面行，所以嶺南民居建築就發展咗好多露台呢類嘅開放式結構，等人有得唞涼。總體嚟講，呢柞特徵令到古典嶺南風格嘅建築物望落都比較輕同涼爽。

就算到咗今日，古典嶺南式建築物喺廣州呢啲大城市嘅商店街成日都會見到，而且香港同澳門都有唔少咁嘅建築物，例如係新田大夫第。

方位同門

粵人喺起屋嗰陣好講究方位，主要係畀強烈嘅風水文化形響咗。粵人起屋嗰陣好多都會請返個風水師去搞佈局。佢哋喺門方面零舍執着－佢哋重有句俗語話「大門朝南，子孫不寒，大門朝北，子孫受罪」：間屋嘅門面向南會畀人覺得係象徵住權力同威嚴，所以一般起屋（尤其係比較有錢嘅人家）都會特登將道門向住南面，而祠堂基本上一定會咁做。大啲嘅屋企建築重會有好幾種唔同嘅門，好似係中門、側門、同儀門呀咁。「中門」響舊時通常都淨係會畀身分地位比較高嘅人－即係屋企嘅男主人、高官、或者抱住男丁嘅女人－行過，而其他人就淨係准用「側門」。「儀門」就係祠堂好多都會有嘅；喺大門之後重有第二道門。呢種門嘅存在主要係因為粵人好多都覺得一入大門就直衝祖先會好肉酸。

雕塑裝飾

傳統上，粵人好鍾意用雕塑同浮雕嚟裝飾建築物。同其他唐人起嘅祠堂比起上嚟，粵人嘅祠堂就鍾意擺好多用木頭同石頭整嘅人物靈獸雕塑去做裝飾，嚟達到「光宗耀祖」嘅效果。嶺南建築雕刻主題好多樣，有歷史故事、神話傳說、吉祥圖案、飛禽走獸、奇花異草呀咁。亦都有啲比較有本地特色嘅景物，好似係洋桃、番石榴、香蕉樹、木棉、同榕樹呢啲嶺南地區成日都見到嘅生果同植物。

青磚

内文：青磚

青磚（粵拼：Ceng¹ zyun¹）係喺嶺南地區好多人用嘅建築材料。佢呈青黑色、密度高、透氣、吸水、抗氧化、淨化空氣，又唔容易變色變形，重好恆温。因為佢呢啲特性，用青磚起嘅屋好捱得到濕氣，夏天嗰陣又會好涼爽－最啱用嚟喺又熱又潮濕嘅嶺南地區起屋。

隘門

内文：隘門

冷巷

内文：冷巷

兩進三間

兩進三間用喺中式廟嘅建築，「三間」就喺正面睇一分為三，有三間唔同用途嘅地方，好似香港文武廟，列聖宮同公所三間，「兩進」係間廟有前後，中間有天井，「後進」高幾級，攞嚟擺神像。

三間兩廊

内文：三間兩廊

圖庫

• 
  喺廣東番禺沙灣鎮，14 世紀起嘅何氏大宗祠；佢嘅色水主要係比較清淡嘅灰白同深綠，有大量浮雕做裝飾，唔用圓柱，而且喺正門之後重有道儀門，係極之典型嘅古典嶺南建築。
• 
  何氏大宗祠拜庭
• 
  一條青雲巷；佢重有隘門。
• 
  又一條冷巷
• 
  古典嶺南建築用好多雕塑。
• 
  古典嶺南建築亦都好興浮雕。
• 
  古典嶺南建築牆上面同屋頂都有浮雕。
• 
  古典嶺南建築連柱上面都有浮雕。
• 
  香港人祖先多數係粵人，所以粵式建築香港有好多。
• 
  香港愈喬二公祠
• 
  澳門嘅三街會館；成棟嘢都係用青磚砌出嚟嘅。
• 
  佛山黃飛鴻紀念館
• 
  廣州華林寺嘅嶺南風格石獅
• 
  廣州黃花崗七十二烈士墓嘅嶺南風格石獅－佢修長嘅身體係嶺南特徵。
• 
  番禺練溪嘅蕭氏宗祠
• 
  嶺南印象園湖景；望遠啲見到啲鑊耳屋。
• 
  新田大夫第嘅洛可可（Rococo）式裝飾；嶺南建築因為粵人成日同西歐人做生意所以多咗啲西歐特色喺入面。
• 
  廣州鄧氏宗祠

鑊耳屋

内文：鑊耳屋

鑊耳屋（粵拼：Wok⁶ ji⁵ uk¹）係嶺南建築好樣眼嘅特徵。好似係下面個圖集入面嘅曾大屋咁，佢哋嘅屋頂兩邊度有對形狀好似鍋嘅手柄嘅牆凸咗出嚟－所以嗌做鑊耳屋。響 15 世紀左右（大明時期）開始，鑊耳形嘅牆係有功名嘅人先有得喺屋企度起嘅嘢，而佢哋嘅高低表明咗嗰個人嘅官位。後嚟民間粵人重有咗喺間屋度起鑊耳形嘅封火牆可以幫自己啲仔同孫做官嘅諗法。但係嗰對鑊耳重有實際嘅功用，例如係起到防火燭同遮太陽嘅作用；後者可以令太陽冇咁容易直接曬住間屋嘅表面，幫手令間屋冇咁熱－呢點喺熱辣辣嘅嶺南地區特別有用。

• 
  廣東花縣嘅資政大夫祠：每間屋屋頂嘅邊緣度都有對鑊耳凸咗出嚟。
• 
  廣州錦綸會館又係有對鑊耳。
• 
  香港沙田嘅曾大屋；佢屋頂嗰度都有對鑊耳形嘅牆。

蠔殼屋

内文：蠔殼屋

唐樓

内文：唐樓

除咗呢啲古色古香嘅建築，有西歐風味嘅多層式建築物唐樓（粵拼：Tong⁴ lau⁴）亦都係嶺南地區響 19 世紀開始出現嘅建築類型。佢哋主要係起嚟畀平民下舖上居咁樣住，喺好似係香港同埋澳門呢啲畀西歐文化影響得犀利啲嘅地方周圍都見得到。香港啲唐樓多數都有三到四層，每層大約係四米高左右。佢哋初頭多數係用青磚起，而後嚟喺 1930 年代開始變成主要用混凝土。第二次世界大戰之後，香港嘅人口升得好勁，嗰時啲人唔夠屋住，於是乎好多唐樓都畀人攞咗嚟整板間房。通常喺一座唐樓嘅住戶度都會有一戶負責做「包租」，令到港式廣東話入面多咗「包租公」同「包租婆」呢兩個詞語。

唐樓住戶嘅生活喺啲有港澳特色嘅戲同電視劇入面成日都會睇到。

• 
  喺香港旺角上海街嘅唐樓；呢種樓喺香港周街都係。
• 
  香港灣仔都有好多唐樓。
• 
  廣東開平赤坎墟都有一排排廿世紀初起嘅唐樓。

嶺南園林

餘蔭山房嘅水池；佢唔似得江南園林，唔用自然池形。園林入面嘅建築物亦都比較細座。

内文：嶺南園林

嶺南園林（粵拼：Ling⁵ naam⁴ jyun⁴ lam⁴）係嶺南獨具一格嘅園林設計，當中最有代表性嘅要數廣東嘅粵中四大名園。

傳統嚟講，嶺南地區山水靚又臨海，有五嶺阻住，環境同北面嘅中原核心地帶好唔同，所以發展咗一套自己嘅風格唔出奇。嶺南地區又熱又成日打風落大雨，所以粵人起園林嗰陣多數會用庭院式佈局－用建築物將個庭園圍住嗮，令到園林入面嘅花草受到保護，打風落大雨嗰時冇咁易畀啲風雨吹爛打爛，而且重可以用呢啲植物嘅陰影幫成笪地降温。地理特徵亦都令到嶺南園林喺規模上面比較細，又唔似得中原嘅園林咁樣畀啲皇家常規制度限住嗮（即係俗語所講嘅「山高皇帝遠」）－佢會揀用木棉樹呢類有本土特色嘅植物同埋用好多木雕同陶瓷呢啲民間工藝品去做裝飾，好似廣州喺廿世紀初起嘅寶墨園就係咁。而且因為佢哋細，好少有山土，所以成日都會「以石為山」－用石頭做假山，例如係餘蔭山房就用咗呢種手法。總體嚟講，呢柞特徵令到嶺南風格嘅園林比較貼近大眾同樸素。

除咗咁之外，嶺南園林喺好多方面見到西歐文化嘅影響。喺理水方面，嶺南園林唔會好似江南園林咁用自然池形水面。佢哋啲水池反而會好似西式園林咁形成規則嘅幾何圖案。再用餘蔭山房嚟做例子，佢由兩個規則形狀嘅水池並列做水庭，環繞八角亭嘅水渠兩邊用園徑同花圃散點山石，重有荔枝同大樹菠蘿呢啲有嶺南特色嘅植物。喺裝飾方面，嶺南園林入面成日都會見到好似係拱形門窗、歐陸式柱頭、或者有色玻璃呢啲西歐風嘅飾物。

睇埋

廣東喺廿一世紀重有繼續發展建築。圖入面嘅係廣州塔。

• 竹筒屋
• 東山洋樓
• 開平碉樓
• 嶺南文化
• 香港建築
• 中國建築