替代品

唔同牌子嘅汽水大致上都係「甜嘅有汽嘢飲」；消費者買咗罐可口可樂就好可能會唔買百事。

替代品（粵拼：tai3 doi6 bun2；英文：substitute good）係經濟學上嘅一個概念，如果話 A 同 B 呢兩件貨品服務係彼此嘅替代品，意思即係話呢兩件嘢能夠滿足嘅慾望好相似，消費者買咗其中一件就唔會想買另外嗰件，所以消費者（例如）喺 A 加價嗰陣大可以索性改買 B。

日常生活嘅替代品例子有唔同牌子嘅汽水：可口可樂同百事一樣係「有甜味嘅有汽嘢飲」，兩者滿足嘅慾望好相似，所以當一位消費者買咗可口可樂，佢就好可能會唔想買百事；而當可口可樂冇得賣或者加價嗰時，消費者大可以改為去買百事。

喺營商策略上，「要點令到自己嘅貨品服務唔能夠輕易被替代」對競爭優勢嚟講好重要：競爭優勢指一個人或者組織具有、幫佢喺表現上打低佢競爭對手嘅特性；要打低競爭對手，一間公司會希望自己嘅貨品服務唔能夠輕易俾對手嘅替代，等啲客會一路幫襯自己，令盤生意長做長有。

概論

睇埋：慾望、消費同互補品

例 1：可口可樂同百事

想像以下嘅供應同需求圖。可口可樂嘅價錢（可能因為生產成本上升等嘅原因）由 $P_{1}$ 升至 $P_{2}$，假設消費者嘅入息等嘅因素不變，需求量（quantity demanded；消費者有能力又願意買嘅量）會由 $Q_{1}$ 下降至 $Q_{2}$；同時，百事嘅價格冇變，但家吓停咗手唔買可口可樂嗰啲消費者改咗用百事嚟滿足自己「想飲有甜味嘅有汽嘢飲」嘅慾望，令百事嘅需求（demand）上升（就算價格不變，消費者嘅需求量都升咗）。

分析

睇埋：關聯規則

喺零售業上，對替代品同互補品（complementary goods）嘅分析相當有用。例如如果知道兩件貨係彼此嘅互補品（互補品係替代品嘅相反；如果 A 同 B 呢兩件貨係要一齊用嘅，是但一件嘅需求升會帶動另外嗰件一齊升，噉呢兩件貨就係互補品），零售商一般會想將呢兩件貨擺埋一齊嚟賣。喺數據科學上，兩件貨品之間嘅替代互補關係可以用以下呢條式表示：

${\frac {\Pr(A\cap B)}{\Pr(A\cup B)}}\,$（有關呢啲數學符號嘅意思，可以睇吓概率論）

想像兩件貨品 $A$ 同 $B$：如果佢哋係互補品，噉消費者理應會成日一齊買呢件貨，所以 $\Pr(A\cap B)$（消費者買嗮兩件貨）數值會高，而 $\Pr(A\cup B)$（消費者買嗮兩件或者淨係買其中一件）數值理應會相對冇咁高，於是上述嘅數值就會大，最大可能數值係 1；而相反如果兩件貨品係替代品，噉消費者理應好少可會同時買嗮兩件，所以 $\Pr(A\cap B)$ 數值會低，而 $\Pr(A\cup B)$ 數值會相對高。即係話，上述呢個比例數值愈大，$A$ 同 $B$ 就愈係互補品，而個數值愈細，$A$ 同 $B$ 就愈係替代品。喺實際應用上，商戶可以用機械學習嘅技術，攞嚟自網購網站等來源嘅數據，計出 $\Pr(A\cap B)$ 同 $\Pr(A\cup B)$ 嘅數值。

睇埋

• 消費
• 經濟價值
• 競爭優勢
• 供應同需求

拎

• （英文） Examples of Competitive Advantage
• （英文） Competitive Advantage