童話

  想搵光良嘅唱碟嘅話，請睇童話 (唱碟)。

最上：19 世紀一幅油畫，描繪一位年老男士講故仔畀佢班孫聽—好多童話都係源自口傳民間故事嘅。
左中：《長髮姑娘》；右中：《灰姑娘》
左下：《小紅帽》；右下：《阿積與豌豆樹》

童話（粵拼：tung4 waa2；大致對應《格林童話》個德文名），又或者叫仙子故事，係一類以短篇故仔形式存在嘅兒童文學同民間故事。屬童話嘅作品多數會涉及民俗同奇幻嘅題材，會用到仙子同魔法嘅相關橋段—例如《白雪公主》有提到矮人、《灰姑娘》有提到神仙教母、又或者《阿積與豌豆樹》有提到魔法荳同巨人呀噉。

童話好多時都係嚟自民間故事嘅，會提到古代平民之間流傳嘅迷信，而且呢啲故仔冇單一作者，會隨住時間而演變出現多重版本—好似係《格林童話》噉，就係收錄咗拃唔知邊個係原作嘅民間故事，包括《糖果屋》、《小紅帽》同埋《睡公主》等等。不過有啲童話會有明確嘅作者—例如可能有個作家鍾意呢啲似民間傳說嘅故仔，所以特登將自己嘅作品寫到似呢啲傳說噉嘅樣。

15 世紀後嘅歐洲出咗好多出名嘅童話故事。由廿世紀起，呢啲故仔就成日畀人攞去改編做漫畫、電影、歌劇同芭蕾舞劇等媒體嘅創作品，幫咗手將歐洲嘅文化發揚到去全世界。

嗌法

睇埋：仙子

童話喺各歐洲語言入面嘅名如下：

英文：Fairy tale	仙子故事
法文：Conte de fées	仙子嘅故事
葡文：Conto de fadas	仙子嘅故事
加泰文：Conte de fades	仙子嘅故事
西班牙文：Cuento de hadas	仙子嘅故事
意大利文：Fiaba	隻字喺意大利文仲可以指寓言。
德文：Märchen	大致可以譯做神奇故事嘅意思。
丹麥文：Eventyr	隻字喺多隻日耳曼語言裏面仲可以指冒險。

而喺主流東亞語言入便嘅名就係：

粵拼：tung4 waa2	漢字寫法：童話
標官：tóng huà	漢字寫法：童話
日本話：meruhen	片假名轉寫：メルヘン
韓國話：mereuhen	諺文轉寫：메르헨

—當中日本話同韓國話嗰兩個名係借自童話故事個德文名嘅。

定義

呢幅畫描繪神仙教母（左邊嗰位年長嘅女士）幫佢教女灰姑娘（右邊嗰個後生女）準備南瓜馬車。

睇埋：民間故仔、口頭文學同動物故事

對於童話具體嚟講要點定義，創意寫作等領域嘅研究者意見不一。2023 年嘅不列顛百科全書噉嚟界定仙子故事：

「

（粵文翻譯）仙子故事，係指涉及奇妙元素同事件嘅神奇故事，唔一定關仙子事。仙子故事呢隻字詞包含咗好似《灰姑娘》同《著長靴嘅貓》等嘅民間故仔，又包含後期啲嘅藝術仙子故事，好似係愛爾蘭作家奧斯卡·王爾德作嘅《快樂王子》（1888 年）呀噉。

」

有學者主張要分清楚童話同動物故事係兩個唔同嘅概念：動物故事係指個故仔啲角色主要係識好似人噉講嘢或者著衫嘅非人動物；舉世聞名嘅古希臘寓言系列《伊索寓言》就充滿咗動物故事，包括係講到兔仔同陸龜識好似人類噉玩賽跑嘅《龜兔賽跑》呀噉。動物故事好多時都冇乜超自然元素，相比之下，仙子故事就成日會講到各種嘅超自然力量—例如係

• 《白雪公主》講到惡毒皇后有一塊魔鏡，塊魔鏡有魔法識講嘢；
• 《灰姑娘》嘅某啲版本講到灰姑娘嘅教母係位仙子，識施展魔法幫灰姑娘；
• 《著長靴嘅貓》講到長靴貓打低一隻識變身術嘅食人魔；

不過一個故仔可以同時屬童話又屬動物故事—即係同時講到擬人化嘅動物，又講到魔法同仙子。

著名故事

睇埋：民俗學同阿爾奈-湯臣分類法

「話說好耐好耐以前...」 —童話故事嘅常見開頭

格林童話

1847 年嘅格林兄弟；佢哋搜集咗大量德文區嘅民間故事返嚟，形成《格林童話》。

内文：格林童話

《格林童話》係史上其中一個最出名嘅童話系列。喺 1812 年，德意志學者兼作家格林兄弟出版《格林童話》，用意係想周圍搜集德意志地區嘅民間故仔，保育德意志人嘅文化遺產。呢個故事集以德文區嘅民間故仔為主，不過亦都收錄咗一啲德文區以外嘅歐洲地區嘅故事。

《格林童話》有一部份嘅故仔後嚟出咗名，傳播到去全世界，例如：

• 《長髮姑娘》：故仔嘅女主角係一個頭髮好長嘅女仔（長髮妹mui1），佢好細個嗰時就畀一個邪惡嘅女巫韞咗喺一座高塔入面；女巫將佢囚禁喺高塔裏面，唔畀佢去外面嘅世界；打後長髮妹巧遇王子，兩個人合力，令到長髮妹得以脫離女巫嘅魔掌；最後長髮妹同王子結婚，大家都開開心心噉生活落去。2012 年嘅迪士尼動畫片《魔髮奇緣》就係取材自呢個故仔嘅。
• 《灰姑娘》：主角係個生得好靚嘅後生女，佢叫「灰姑娘」；根據《格林童話》個版本，灰姑娘嘅後抵乸同兩個繼姐虐待佢，當佢係工人噉嚟使；有日，宮廷想搞舞會；本來灰姑娘冇得出席，但係佢得到親生阿媽嘅靈魂幫助，得以著住靚衫同金鞋去舞會，佢仲喺舞會上同王子墮入愛河；灰姑娘冇講佢真正身份畀王子知，但灰姑娘離開舞會嗰陣唔覺意漏低咗隻鞋；打後王子靠住隻鞋搵返佢，仲娶埋佢做老婆，而灰姑娘嗰兩個黑心嘅繼姐亦冇好下場。迪士尼將呢個故仔改編咗做動畫片《仙履奇緣》。
• 《白雪公主》：主角係一位公主，佢生得好靚，頭髮純黑得嚟肌膚又好似雪咁白淨，所以個名叫「白雪」公主；根據家陣流通嗰個版本，白雪個後抵乸母后妒忌白雪生得靚過佢，所以就多次嘗試殺害白雪；白雪公主因而逃離城堡，走入森林受到七個小矮人收留；打後惡毒女皇扮成阿婆請白雪公主食毒蘋果，搞到白雪公主昏迷不醒，不過最後王子嚟到救返醒白雪公主，而惡毒女皇最後亦都冇好收場。自從廿世紀起，《白雪公主》就畀人改編咗做好多唔同嘅影視作品，例如係迪士尼動畫片《雪姑七友》噉，而日本嘅著名恐怖漫畫家伊藤潤二就有畫恐怖版嘅《白雪公主》漫畫。

除此之外，包括《青蛙王子》、《糖果屋》、《小紅帽》、《睡公主》、《個名怪嘅小妖》、《著長靴嘅貓》同埋某啲版本嘅《美女與野獸》等等，都有被收錄喺《格林童話》入面。

順帶一提，《藍鬍鬚》呢個故仔都曾經畀人收錄喺《格林童話》裏面，但係呢個故仔畀好多嫌佢太過恐怖唔啱細路睇，後期啲嘅版本冇再收錄。

• 
  插畫：白雪公主畀惡毒女皇毒害昏迷不醒，
  七個小矮人以為白雪公主死咗所以好傷心。
• 
  插畫：長髮姑娘住喺高塔裏面，去唔到外面嘅世界。
• 
  插畫：《糖果屋》當中對小兄妹遇到女巫。
• 
  插畫：灰姑娘試著玻璃鞋，啱啱好著得落。
• 
  插畫：《千皮公主》當中「公主同國王喺舞會上跳舞」嘅情境。

安徒生

1860 年代嗰陣嘅安徒生；佢一世人寫咗好多童話故事。

内文：安徒生童話

丹麥作家漢斯·克里斯汀·安徒生係童話故事嘅另一個重要來源。安徒生喺 1805 年出世，一路去到 70 歲先死，佢一世做作家寫咗過百個童話故事，當中有唔少到咗廿一世紀初都仲有人睇。

同格林童話有異嘅係，安徒生童話由單一作者寫：格林童話主要源自口頭文學，有唔少故仔都可以追溯到去中世紀後半期（大約 10 至 15 世紀間）咁久遠，但一路都齋靠口傳冇畀人寫低；因為噉，呢啲故仔成日都會喺民間流傳多重版本，而且仲難以溯源，唔知邊個先係原版；相比之下，安徒生童話有一個明確嘅作者，雖然啲故仔多次畀人攞去改編，不過每個故仔都梗會有個「原版本」。

安徒生童話當中，比較出名嘅有：

• 《人魚公主》：個故仔講到一條美人魚上海面玩嗰陣巧遇王子；佢對王子一見鍾情，好想同王子喺埋一齊，於是就走去同海女巫做交易，放棄自己條魚尾同自己嗰把甜美嘅聲；變咗人類但啞咗嘅佢，最後成為到王子嘅密友，但王子始終無意同佢結緍；後嚟王子仲鍾意咗另一個女人，同嗰個女人結婚，而小美人魚事先同女巫講好，如果佢做唔到同王子結婚就要變做泡沫；最後結局係點，就要視版本而定—有好多版本係講悲劇收場，話小美人魚最後死亡化成泡沫。
• 《醜小鴨》：故仔講到一隻鴨仔天生個樣就同第啲鴨仔唔同，好醜樣；第啲鴨仔成日都哈佢，搞到佢好自卑同孤單；有一日，醜小鴨決定要離開屋企，去搵一笪令佢覺得受接納嘅地方，醜小鴨一路都搵唔到；不過佢有日望自己喺湖面嘅倒影，驚奇噉發現自己變咗隻好靚嘅天鵝—原來佢一路都係隻天鵝仔，只係佢唔知自己真正身世，最後佢飛咗上天同其他天鵝一齊過住開心快樂嘅生活。
• 《賣火柴嘅姑娘仔》：安徒生童話當中一篇比較短嘅作品；個故仔講一個賣火柴嘅細路女臨凍死前嘅經歷，畀好多人覺得係史上最悲慘嘅故仔之一。

仲有係《皇帝件新衫》、《冰雪女王》同《手指公姑娘》呀噉。安徒生童話都有多次噉畀人改編做電影同芭蕾舞劇等嘅作品，例如迪士尼噉就將《人魚公主》改編咗做《小魚仙》，又將《冰雪女王》改編做《魔雪奇緣》。

• 
  插畫：小美人魚喺佢嘅花園度仰慕人類嘅雕像。
• 
  插畫：醜小鴨一生saang1落嚟個樣就同其他鴨仔唔同。
• 
  圖畫：賣火柴嘅細路女喺街頭凍死。
• 
  圖畫：畫畫人想像中嘅冰雪女王

第啲來源

呢幅插圖描繪畫畫人想像中嘅《美女與野獸》故事，情節講到野獸昏迷不醒。

呢幅插圖，嚟自《木偶奇遇記》嗰本原著小說，描繪嘅係主角小木偶。

睇埋：沙略·佩羅

• 《伊索寓言》：源自古希臘，有時會當係童話。
• 《鵝媽嘅故事》：喺 17 世紀尾出版，由著名法國童話作家沙略·佩羅寫嘅作品組成，包含咗沙略·佩羅版本嘅《睡公主》、《小紅帽》、《藍鬍鬚》、《著長靴嘅貓》同埋《灰姑娘》等等；呢啲故仔好多時都同《格林童話》入面嘅版本有明顯嘅出入。
• 《美女與野獸》：1740 年出版。
• 《愛麗絲夢遊仙境》：1865 年出版。
• 《薑餅人》：1875 年首次出版，個故仔講到一個薑餅人逃離人類，但最後畀隻狐狸食落肚。
• 《木偶奇遇記》：1881 年出版嘅一本意大利文奇幻小說，講到一個男仔噉形嘅木公仔得到生命，佢初頭好曳但後嚟變咗做個又乖又勇敢嘅細路，最後得以變成一個真嘅男仔。
• 《快樂王子與其他故事》：由愛爾蘭作家奧斯卡·王爾德喺 1888 年 5 月出版嘅一本故事集，包含咗 5 個故仔，當中《快樂王子》可以算係最出名嗰個。
• 《綠野仙蹤》：一系列美國小說，始於 1900 年；個故仔講到住喺干沙州嘅少女桃樂絲·基奧畀大風吹咗去魔幻國度柯茲國。
• 英倫嘅民間故事：例子可以睇吓
  • 《阿積與豌豆樹》、
  • 《金髮妹同三隻熊》同埋
  • 《三隻豬仔》噉。
• 傳統上，仙子係一個歐洲嘅概念，不過歐洲以外嘅地區都有好多故仔，係具有童話嘅某啲特徵嘅，例如
  • 《天方夜談》
  • 《聊齋誌異》
  • 台灣嘅《虎姑婆》
  • 日本嘅《桃太郎》
  • 有關粵文化特色嘅童話，可以睇吓廣府民間故事同木魚書裏面嘅某啲故仔。

呀噉。

常見橋段

呢幅插圖描繪《小手指公》其中一段，講到小手指公偷走食人魔對靴。

擬人化：呢幅圖描繪著長靴嘅貓同農民講嘢。現實嘅貓唔識好似人噉著靴，但著長靴嘅貓就識。

一見鍾情：喺《睡公主》裏面，公主大半時間都喺度睏覺；王子未同公主講過嘢就鍾意咗公主。

睇埋：奇幻橋段同魔法

以下呢啲橋kiu2，都係童話成日用嘅。

童話角色

内文：仙子、巫婆同惡龍

睇埋：奇幻種族

• 仙子：指中世紀（大約 5 至 15 世紀期間）歐洲民間故事當中嘅一類超自然生物；中世紀嗰陣啲仙子係好似邪靈噉嘅，會用各種方式害人；不過仙子嘅形象喺歷史上一路變化，到咗廿世紀嗰陣仙子嘅形象就變咗做
  1. 好多時有好似蝴蝶（或者第啲昆蟲）噉嘅翼曉飛，
  2. 會施展魔法幫人

  嘅人形生物。

  • 仙子教母：童話成日提到嘅一種固定角色，有以下呢啲特徵：
  1. 係仙子，識得用魔法；
  2. 外形上係有咁上下年長嘅女性—望落似主角阿媽；
  3. 同主角有特別關係，例如係主角嘅教母，所以有動機幫主角；

  例子可以睇吓沙略·佩羅版嘅《灰姑娘》，講到灰姑娘冇得去舞會嗰陣時si2，佢個仙子教母出場，施展魔法變條靚裙畀灰姑娘著上身，等灰姑娘有得去舞會。又可以睇吓《睡公主》，講到奧羅拉公主嘅仙子教母施法，打消邪惡仙子嘅惡咒，保護奧羅拉公主免被惡咒殺死。

• 女巫：一種固定角色，指識得用魔法嘅女人，例如《白雪公主》講到大奸角惡毒皇后有塊魔鏡，塊魔鏡識講嘢會話佢知「邊個係世上最靚嘅」，而惡毒皇后就係靠住呢塊鏡得知白雪公主住喺七個小矮人嗰度。
  • 亦可以睇吓《長髮姑娘》、《糖果屋》、《人魚公主》同埋耶加婆婆相關嘅故仔。
• 各種嘅超自然生物：例如
  • 《白雪公主》有提到矮人呢種日耳曼人民間故事嘅傳說生物；
  • 《著長靴嘅貓》同《小手指公》都有提到食人魔呢種會食人嘅傳說生物；
  • 《阿積與豌豆樹》有提到巨人。
• 擬人化：擬人化係指將一啲唔係人嘅事物「人化」，例如《醜小鴨》就將鴨仔同天鵝描繪成會好似人噉講嘢諗嘢，或者《金髮妹同三隻熊》將熊人jan2描繪成識得好似人噉煮嘢食。
  • 大壞狼：一種固定角色，泛指負責喺個故仔入面扮演大奸角嘅灰狼，通常會嘗試將主角食落肚；例如《小紅帽》入面嗰隻灰狼能夠好似人類噉講嘢，形象好似個強姦犯噉（會跟蹤同傷害細路女），係隻好典型嘅大壞狼；類似嘅狼角色喺《三隻豬仔》同《狼同七隻小山羊》當中都有出現。
• 貴族：好多童話故事都會提到王子同公主等嘅貴族角色；事實係，白馬王子已經係種固定角色，指生得俊俏又勇武嘅王子，成日都負責打低惡龍同埋拯救公主，最後仲會娶公主做老婆。除此之外，亦都可以睇睇
  • 城堡：中世紀歐洲起嚟畀貴族住嘅一種建築物，會有防禦工事；
  • 舞會：傳統上，歐洲嘅貴族好興搞舞會，用嚟畀啲人聚會交際；例如《灰姑娘》就講到王國搞舞會畀王子選妻，個故仔嘅情節講灰姑娘喺舞會上畀王子睇中，最後仲成功做到王妃。
• 後底乸：童話成日都會講惡毒嘅後底乸糟質主角，例如《白雪公主》、《灰姑娘》同埋《野天鵝》噉。

呀噉。

其他橋段

内文：大團圓結局

• 大團圓結局：大團圓結局係指個故仔最後「大團圓」—啲奸角會受到懲罰冇好下場，而其他角色就齊齊幸福快樂噉生活落去。童話故事好多時都係講大團圓結局。如果想睇冇大團圓結局嘅童話，可以睇吓某啲版本嘅《人魚公主》悲劇收場，講小美人魚最後變成泡沫死亡。
• 一見鍾情：指兩個本來唔相識嘅人，一見面就馬上鍾意對方，最後墮入愛河甚至結婚；有好多童話故事都係講王子同公主愛上對方，而且仲要係識咗對方唔夠幾日就撻着，當中《睡公主》畀好多人認為係最誇張嘅—王子從來都未同公主講過嘢，完全唔知公主性格係點，但佢一見到睏緊覺嘅靚女公主，就即刻對公主產生好感。
• 靚：
  • 《白雪公主》講到後底乸女王妒忌白雪公主生得靚過佢，所以想殺害白雪公主。
  • 《美女與野獸》講到王子細個嗰時成日以貌取人，因而畀仙子變佢做核突野獸。
  • 《醜小鴨》講到天生醜樣嘅「鴨仔」，原來大咗係隻生得好靚嘅天鵝。
• 唔公平嘅交易：
  • 《長髮姑娘》講到兩夫婦為咗想得到啲蔬菜，搞到畀女巫搶走佢哋個女。
  • 《美女與野獸》講到女主角阿爸因為想要玫瑰，搞到女主角要去野獸嘅城堡做人質。
  • 《阿積與豌豆樹》講到阿積賣咗隻乳牛，得到嘅係五粒望落冇乜價值嘅荳。

呀噉。

啱細路化

童話嘅影響：1969 年呢張蘇聯郵票宣傳緊《睡公主》芭蕾舞劇表演。

廿世紀初呢幅插畫描繪嘅係美國童話《薑餅人》。

睇埋：迪士尼同兒童文學

自從 19 世紀起，童話開始慢慢變成兒童文學嘅一環，開始畀人當做「專攞嚟畀細路睇同聽嘅故仔」。1812 年出版嘅《格林童話》，原版個德文名

Kinder- und Hausmärchen

就大致係細路同屋企嘅故仔噉嘅意思，而且格林兄弟仲有意噉想令啲故仔變得「啱細路睇」，將某啲有性愛描寫或者暴力嘅內容攞走—例如《藍鬍鬚》呢個故仔噉，講到身為連環殺人狂嘅藍鬍鬚先後娶咗幾個老婆，次次都將個老婆殺死同埋將條屍收埋喺密室度，搞到密室成地血；初版嘅《格林童話》有收錄《藍鬍鬚》，但後期啲嘅版本就冇再收錄，據講就係因為啲讀者覺得個故仔太過暴力太過恐怖。

喺廿世紀期間，童話繼續出現「啱細路化」或者「迪士尼化」嘅情況。廿世紀嗰陣發生咗一場巨變：迪士尼喺 1937 年出咗著名動畫片《雪姑七友》一炮而紅；自從嗰時之後，迪士尼一路都有將童話改編做電影，途中會將原版個故仔嗰啲兒童不宜嘅內容攞走，務求令到啲故仔「合家歡」—畀人話係將啲故仔「迪士尼化」咗。

原版嗰啲仙子故事，往往係口傳嘅民間故事，唔一定係預咗畀細路聽嘅，甚至可能根本係講古代歐洲人驚嘅事物。因此，呢啲故仔時不時都會有（正常嚟講）認為係唔啱細路睇、甚至乎係恐怖嘅內容，例子可以睇吓：

• 《白雪公主》：喺《格林童話》初次收錄嗰個版本當中，王子救返白雪公主之後，白雪公主接受王子嘅求婚，於是佢哋就郁手搞婚禮；喺婚禮上，惡毒王后出場，而王子一見到惡毒王后就叫啲手下準備一對鐵鞋，對鞋用火燒到好紅好熱，然後王子就迫惡毒女皇著住火紅嘅鐵鞋嚟跳舞，惡毒女皇一路慘叫一路跳，跳吓跳吓就躂低死咗。呢段畀好多人覺得太暴力。
• 《灰姑娘》：喺《格林童話》嘅版本當中，灰姑娘嘅繼姐好想著得落玻璃鞋，乜都肯做，於是灰姑娘個後底乸就攞起把刀，叫兩個親生女一個斬自己嘅腳趾一個削走自己嘅腳踭；不過王子都唔上當，而灰姑娘跟王子走咗之後，有群雀仔追住兩位繼姐嚟啄，啄盲咗佢哋對眼。呢段都係畀唔少人覺得暴力。
• 《小紅帽》：喺「啱細路化」咗嘅版本當中，大壞狼吞咗嫲嫲同小紅帽落肚，但兩個人後嚟畀路過嘅獵人救返；早期啲嘅版本就好唔同，講到大壞狼唔單只殺死嫲嫲，仲將嫲嫲嘅肉放上碟同埋將嫲嫲嘅血倒入酒樽，小紅帽一到步，大壞狼就假扮嫲嫲招呼小紅帽食嘢—於是小紅帽唔知情噉食咗嫲嫲嘅肉同飲咗嫲嫲嘅血。
• 《長髮姑娘》：原版個故仔講到，長髮妹想跟王子離開女巫嘅高塔，兩個人私下結婚仲行hang4埋房，點知長髮妹個肚畀王子搞大咗，女巫因為噉而知道長髮妹喺度同王子幽會；格林兄弟認為呢段情節完全唔適合畀細路睇，所以就對呢段內容作出咗顯著嘅更改。
• 《人魚公主》：原版話小美人魚飲咗女巫嘅神藥化成人身，佢「飲藥嗰刻覺得好似個肚畀把劍捅到」而且「變咗人形之後，每行一步路都好似腳板畀刀插」－呢啲內容畀好多人認為會令細路不安，而 1989 年迪士尼出咗改編自《人魚公主》嘅電影《小魚仙》，將呢啲內容攞走咗。

呀噉。

喺廿世紀尾至廿一世紀初嗰陣，都有一啲虛構故仔開始用返原版童話故事嗰啲「唔啱細路睇」嘅內容，例子可以睇吓 2014 年奇幻片《魔法黑森林》噉，套戲用童話故事做主題，講到灰姑娘嘅繼姐為咗著得落隻鞋而斬腳趾削腳踭。

睇埋

• 芭蕾舞劇：芭蕾舞劇成日都會用童話做主題；有好多芭蕾舞劇嘅故仔都似童話，包括係《天鵝湖》同《胡桃夾子》噉，有啲劇直頭係改編自童話嘅，例如《睡公主》。
• 寓言故事：寓言故事係一種有教育成份嘅故仔，成日攞嚟講畀細路聽。
• 史力加：呢套戲同相關嘅作品，都係喺度惡搞緊童話故事啲橋段。
• 奇幻
• 恐怖
• 吟遊詩人

拎

• （香港繁體） 童話故事 - 香港 01
• （英文） 仙子故事係喺邊度嚟嘅？，BBC
• （英文） Fairy Tale，電視橋段網呢頁講童話。
• （英文） Fairy Tale Tropes，電視橋段網呢頁講邊啲橋段係童話常用嘅。